Deur Emsie Martin

Die man is joviaal en geliefd onder mense, maar agter die masker skuil daar iemand wat dink en glo hy is die belangrikste persoon in die wêreld. Die mense by die huis ervaar egter nie dieselfde joviale, behulpsame persoon nie. Niks is ooit hierdie persoon se skuld nie en hy sê ook nooit hy is jammer nie.

Dit help nie om met mense hieroor te praat nie, want hulle sal jou nooit glo nie.

Maar wat is ʼn narsis nou eintlik?

Die algemene kenmerke van ʼn narsistiese persoonlikheidsversteuring is ʼn oormatige beheptheid met selfbeeld, mag en vertoon.

Mense wat aan NPV ly, se idee van hul selfwaarde is oënskynlik so hoog dat hulle hulself as beter en belangriker as ander beskou. Hulle het egter ʼn kenmerkende lae selfbeeld en sukkel om kritiek te hanteer, wat veroorsaak dat hulle gereeld probeer kompenseer deur ander te verkleineer.

Kenners sê narsiste word gekenmerk deur eiebelang en die gebrek aan empatie vir ander, maar narsisme en emosionele mishandeling loop vir my dieselfde pad. Hierdie mense kan jou emosioneel dreineer. ʼn Narsis wil graag die middelpunt van belangstelling wees en in elke gesprek bewonder word.

Hoe ken ons hierdie mense uit?

• Narsiste het ʼn onversadigbare behoefte aan bewondering en erkenning vir wat hulle doen en wil daarom geprys word.
• Hulle glo werklik die wêreld draai om hulle en hul behoeftes.
• Narsiste weet hoe om te ontvang, maar nie hoe om van hulself te gee nie.
• Kenmerke sluit in woedebuie, afhanklikheidsvormende gewoontes en ontrouheid.
• ’n Narsis kan nie empatie betoon nie en het nie die vermoë om ander se behoefte en gevoelens raak te sien en te erken nie.
• Hulle hou ander mense emosioneel op ʼn afstand, behalwe as hulle iets van hulle wil hê.
• Hulle glo hulle is geregtig op spesiale aandag en wil altyd dadelik gehelp wees.
• Hulle het nie emosionele warmte nie en het nie die vermoë om ʼn intieme verhouding in stand te hou nie.
• Jy, die eggenoot, is altyd verkeerd. Harde woorde kan selfs of aanranding uitloop.
• ʼn Narsis geniet dit om sy slagoffer te sien swaarkry, so asof hy iets bereik het.
• Hulle foute, mislukte projekte of wanneer hulle hul werk verloor, is altyd ander se skuld.
• Narsiste tree anders op by jou as wanneer hulle tussen ander mense is.
• Hulle jok gereeld, steek dinge weg en verdraai feite om hul eie agenda te regverdig.
• Hulle is uitermate selfsugtig en toon min sensitiwiteit teenoor geliefdes.
• Hulle het min emosionele warmte; hul enigste doel is om hulself te bevoordeel.
• Hulle bederf gewoonlik familiebyeenkomste.
• Hulle het ʼn ongesonde selfobsessie, wat daartoe lei dat hulle daarvan oortuig is dat die lewe hulle iets skuld.
• Narsiste soek nie werklik ʼn maat nie, maar ʼn gehoorsame bewonderaar wat hul onversadigbare ego gereeld streel en vertroetel.

Dr. ST Potgieter, sielkundige van Bellville, sê daar is ʼn verskil tussen gesonde narsisme en patologiese narsisme.

“Gesonde narsisme (selfliefde) beteken dat jy jouself lief het, maar ook ʼn liefde en begrip vir jou naaste het.

By patologiese narsisme is dit ʼn geval van “ek het myself lief en dit is al”.

Wat doen ek

Om met ʼn narsis getroud te wees, kan tot eensaamheid en hartseer lei weens swak kommunikasie, onwilligheid om aan die huwelik te werk en ʼn gebrek aan respek.

Narsiste veroorsaak gewoonlik dat jy jou van sosiale aktiwiteite onttrek, want eensaamheid is draagliker as die verleentheid wanneer hulle jou voor ander beledig

en vernederende aanmerkings voor vriende, familie en kollegas maak.

Leer om hierdie mense te hanteer want hulle het geen insig in hulle probleem nie en gaan nie sommer verander nie. In hulle gedagtes dink hulle “Hoe kan ek verskoning vra as ek altyd reg is?”

Hoe hanteer ek my narsistiese man?

• Skaal jou verwagtinge af, want hy is nie in staat om jou emosies te verstaan nie.
• Besef dat jy nie die een met die probleem is nie.
• Moenie sy optrede persoonlik opneem of toelaat dat hy jou minderwaardig laat voel nie.
• Streel sy ego, maar wees opreg. Dit is uitputtend, maar onthou hy het ʼn baie swak selfbeeld.
• Moenie die heeltyd op eiers loop omdat jy en die kinders vrees pa kan dalk kwaad word nie.
• Kyk anders na sy optrede en woedebuie. Dis ʼn teken van onsekerheid, bly eerder stil en loop weg.
• Moenie histeries raak wanneer hy jou beledig nie.
• Praat oor jou gevoelens al sal hy jou kritiseer of laat skuldig voel.
• Narsiste vrees verwerping. Hy kan verander sodra hy besef al sy verhoudings loop skeef.
• Sorg dat jy ʼn ondersteuningsnetwerk het. Maak tyd vir jouself, raak finansieel onafhanklik, begin ʼn stokperdjie sodat jy ook positiewe terugvoer kan kry. Daarna kan jy die magsbalans in jou huwelik takel.

Solidariteit verstaan dat arbeidsverhoudingspesialiste, kantoorpraktisyns, gesondheidspraktisyns en selfs mense in ander beroepe unieke uitdagings ervaar, soos om onder baie druk te werk en ʼn wye verskeidenheid inligting, kennis en vaardighede moet hê en saam met mense met unieke gesondheidskwessies en selfs narsiste moet werk, en daarom bied Solidariteit Beroepsgildes vir jou ʼn geleentheid om by enigeen van hul gildes aan te sluit. Besoek gerus die skakel https://gildes.solidariteit.co.za/ vir meer inligting.

Bronne

https://kerkbode.christians.co.za/2019/10/22/help-my-man-is-n-narsis/

https://www.netwerk24.com/sarie/Ons-Lewe/Hieroor-Praat-Mense/het-jy-n-verhouding-met-n-narsis-20170914