Deur Emsie Martin
Ons almal weet vakansies is nie sonder beserings nie, daarom is elke ma voorbereid op skrape, snye, brand- of steekwonde, blou kolle en trane.
Gelukkig het ouers daardie spesiale instink om hul kinders se ongelukke of ongelukkies te hanteer. Van ʼn pers knop so groot soos ʼn eier op jou kind se voorkop tot ʼn bloeiende wond word deel van ʼn ouer se lewe en ontstel ons nie meer so erg nie. Met ontsmettingsmiddel, helderkleurige pleisters en baie drukkies en soene, weet ʼn ma dat sy baie klein ongelukkies kan hanteer. Die geheim is om voorbereid te wees op dié ongelukkies terwyl jy met vakansie is.
Eenvoudige, maar noodsaaklike items in die noodhulpkissie vir groot en klein:
Verbande en middels vir wonde, skrape en so meer:
- Wattepluisies, om die wond skoon te maak voordat jy ʼn pleister of verband opsit.
- Kleefverbande, gewone verbande en steriele verbande om die wonde te versorg en te verbind.
- Knippies om die verbande netjies in plek te hou.
- Pleisters van verskillende groottes om die wond te bedek.
- Driehoekige verbande wat as ʼn hangverband (‘sling’) gebruik kan word vir ʼn beseerde arm of enkel ens.
Medisyne en middels:
- Pynstillers wat geskik is vir kinders, soos parasetamol (Panado).
- Rehidrasiesoute wat in water opgelos kan word om vog te vervang wat verlore gaan as die kind diarree het, braak of sonsteek opgedoen het.
- Middels om diarree, krampe en maagpyn te behandel.
- Insekweerder geskik vir kinders.
- Vir brandwonde: hou onder koel lopende water of in ysblokkies omdat dit help om die brandproses, wat voortduur solank die plek warm bly, te stop. As dit ernstig is, kom so gou moontlik by ’n hospitaal.
- Goeie sonskermmiddel (SPF 30), want slegs een of twee erge rooibrand-sonbrande kan later tot velkanker lei.
- Seesiek-tablette geskik vir kinders.
- Bykomende spesifieke medikasie: Natuurlik sal jou nog ander medisyne by jou noodhulpkissie wil voeg, afhangend van jou gesin se spesifieke behoeftes, soos allergie-medisyne en asmapompies en so meer.
Ander noodsaaklikhede:
- Wegdoenbare mediese handskoene om aan te trek as jy ʼn wond versorg.
- ʼn Koorspen.
- ʼn Knyptangetjie (“tweezer”).
- ʼn Groot en klein skêr
Voorsorg teen voetskimmel en ander kieme:
As jy in ʼn vakansie-oord tuisgaan, is Thursday Plantation tea tree oil perfek om in die storte, baddens en wasbakke te drup as antibakteriële middel vir daardie ekstra gemoedsrus voordat jy dit gebruik. Mens weet nie of die vorige vakansiegangers dalk hoogs-aansteeklike voetskimmel gehad het nie. As jy of jou kinders ʼn openbare of strandstort gebruik, sal ʼn paar druppels op jou voete jou help beskerm teen die opdoen van swaminfeksies soos voetskimmel.
Naaste dokter en hospitaal se besonderhede en nommer:
Onthou om die kontakbesonderhede van die naaste dokter of hospitaal by jou vakansiebestemming na te slaan en die nommers op jou selfoon te laai.
Met ʼn bietjie voorbereiding en ʼn basiese noodhulpkissie, is jy en jou kinders gereed om julle vakansie te geniet. Pak maar baie liefde en drukkies ook in, ry versigtig en kom veilig tuis.
BRONNE:
https://www.rsgplus.org/gesondheid/die-essensiele-noodhulp-kissie-vir-kinders/
